Miðaldra eða ekki!

Nú, þá er það ljóst að ég er orðin miðaldra. Ég komst að því á heldur hranalegan hátt þegar ég las forsíðu Fréttablaðsins um helgina. Þar stóð í fyrirsögn að miðaldra konur hefðu verið teknar með kókaín...síðan hófst fréttin þar sem fram kom að kókaínkonurnar hefðu verið á fimmtugsaldri. Þetta var eins og að fá blauta tusku í andlitið, jafnvel tvær. Ég er sem sagt á fimmtugsaldri en mér finnst ég ekki alveg komin á það skeið að kallast miðaldra, þó ég sé orðin amma! Hugsanlega þegar ég er orðin fimmtug en ekki fyrr og hananú - skamm skamm. Blaðamaðurinn/konan sem skrifaði fréttina getur ekki verið meira en 25 ára nema hugsanlega sé um bogmann að ræða.
Fór á laugardagskvöldið í Borgarleikhúsið að sjá Eilífa hamingju og varð ekki svikin. Þetta er hin besta skemmtun og broddur í því líka og leikararnir sem ég þekkti ekki (segir mér kannski að ég sé orðin miðaldra) stóðu sig vel og það var snilldarlegt upphafsatriðið þegar "sigurvegarinn" var í höfuðstöðu (og það ekki bara venjulegri) í heillangan tíma og hreyfðist varla - greinilega farið í einn eða tvo jógatíma sá!

Athugasemdir

[Guðríður Hrefna Haraldsdóttir, 19.2.2007 kl. 11:04]

Elskan mín, um leið og ég skreið yfir 40 árin hef ég í sífellu heyrt að ég sé orðin svo gömul (sko göngugrindar-gömul). Hef bent fólki rólega á að ég sé fjórum dögum eldri en Madonna og ekki er hún gömul. Það er ekkert slæmt við að eldast nema þetta ... Ég er kornung miðað við 75 ára konu sem myndi vilja gefa af sér annan fótinn til að verða ung eins og ég ...

En ég man hvenær ég heyrði fyrst þetta með að vera MIÐALDRA svona ung. Þá var elskan hún Dóra Takefusa með Djúpu laugina og Ellý (X-Factor) og fleiri konur í kringum 35-39 ára voru í þættinum. Dóra kallaði konurnar miðaldra og fannst æði að gefa miðaldra fólki sjens á því að koma í þátt unga fólksins!!!  Í minni fjölskyldu ... og ég hef alist upp við það að fólk eldra en 50 ára, jafnvel 60 ára, sé kallað miðaldra!!! Einhver ótrúleg þörf fólks til að setja annað fólk í kassa og skilgreina það sem eitthvað (t.d. gamalt) ... Stelpurnar sem vinna með mér hafa gaman af því að ég fíli sömu tónlist og þær og geti samt verið mamma þeirra! Hvað kom eiginlega fyrir? Síðan hvenær hafa rúmlega fertugar konur verið skilgreindarr miðaldra eða gamlar???  Heyrði þetta fyrst hjá Dóru fyrir c.a. 6 árum!

[Ibba Sig., 19.2.2007 kl. 11:09]

Svona, svona Gyða mín. Ekki vera með þessi uppsteyt. Reyndu frekar að klára hekla  þetta fallega sjal og svo á eftir verður dansað við harmonikkutónlist í matsalnum.

[Gyða Dröfn (IP-tala skráð) 19.2.2007 kl. 14:56]

Ég kaupi þetta bara ekki alveg - ég kemst enn í splitt og geri aðrir betur. Og ekki orð um það meir - við höfum nógan tíma til að vera miðaldra, bara einhvern tímann seinna!