Hugleiðsla

Jæja, þá er tónlistarskólinn okkar, Tónheimar, farinn að rúlla en síðustu fjórar vikur hafa verið ansi töff! Við tefldum á tæpasta vað með því að koma ekki heim fyrr en tveimur vikum áður en skólinn hófst en eins og ævinlega þá hafa hlutirnir tilhneigingu til að leysast og við erum ótrúlega glöð með þann fjölda fólks sem hefur áhuga á að læra að spila á píanó eftir eyranu. Mánaðardvölin á Sonoma fjalli skilaði okkur í góðu standi heim og ég fattaði það nokkrum dögum eftir að ég kom heim að öll mín vöðvabólga var á bak og burt enda er þessi staður undursamlegur. Ég neita því ekki að þótt margir haldi að það sé auðvelt að stunda zen hugleiðslu ( í stuttu máli að sitja, þegja og fylgjast með andardrættinum) þá tekur það nú á og þá sérstaklega að vakna nánast um miðja nótt eða kl. 4.30. Það er samt svo skrítið að þegar líða fer að lokum tímabilsins og biðin eftir að þessu ljúki orðin löng, þá kom sú tilfinning yfir mig þegar Ango var lokið að ég væri tilbúin til að gera þetta strax aftur. Svona svipað og þegar konur eignast barn og eru þegar barnið er fætt tilbúnar í annað. Ég er líklega undantekningin sem sannar regluna - sagði í fæðingu Tinnu fyrir rúmum 22 árum að ég ætlaði ekki að gera þetta aftur og einhver hefur tekið mig á orðinu (líklega ég sjálf).

Nú hefst hins vegar næsta verkefni því Zen kennarinn okkar, Kwong roshi, er á leiðinni til landsins og við munum fara út úr bænum og stunda hugleiðslu í nokkra daga. Hann er alveg ótrúlegur þessi yndislegi maður, hefur komið hingað árlega í bráðum 20 ár og iðkað með okkur. Við ætlum að bjóða upp á námskeið í hugleiðslu þar sem hann mun m.a. tala um zen iðkun en hann byrjaði sjálfur að stunda zen hugleiðslu fyrir fjörtíu og fimm árum og hefur sl. 37 ár rekið ásamt eiginkonu sinni, Shinko, zen setur á Sonoma fjalli í Kaliforníu - bara unaðslegur staður þrátt fyrir að ég eigi stundum erfitt með að stíga niður fæti af ótta mínum við eiturslöngur og viðlíka skepnur sem samt eru ekki beint að reyna að troða manni um tær þarna. Hins vegar ganga kalkúnarnir um eins og þeir eigi svæðið en bambarnir eru örlítið hógværari þegar þeir spígspora um svæðið. Við erum sem sagt zen hópurinn á fullu að undirbúa það sem við köllum sesshin (hugleiðsludagar) sem verður í Skálholti í næstu viku.